La pazzia de lo Pesce d’Aprile stà facenno lo giro de lo munno da paricchio tiempo, e poche songo chille tra li letture mieje che non nne sanno lo significato. Pure pe contentà chille poche che fuorze non nne canosceno lo mèreto abbesogna scennere a li particolare, ed eccome a servirele.
Lo poisson d’avril, comme se chiamma ‘nfrancese, e in inglese april-fool, scozzese gowk, ‘ntedesco aprilnarr, vuce tutte quante che corrisponnono a cucco d’aprile non ha autra origgene che da la pazzia de no francese, comme pretenne no cierto Grimm, e che solamente all’urdėme sécole se ‘ntroducette dinto a la Germania. Nce stà chi dice pure ca sto cucco fuje causato da no tale Francisco Lorena, prigioniero de Luigio 13.° a Nancy, che se sarria sarvato natanno attraverzanno no sciume; e chi dice ancora ca è ll’ origgene de na festa antica, addò se nce mannava inutilmente la gente pe ffarle na coffiatura, e quanno se vedeva tornà no la repassavano diversamente che co ddicerle: è stato no pesce d’aprile.
Lo pesce d’aprile nn’ autre termene è na repassatura che ha fatta co ttutte Ii sette senze de lo cuorpo. Se piglia no povero diavolo e se manna a na parte co na mmasciata, mentre sta parte e sta mmasciata non starranno pe niente ‘ncalannario. Se farrà no viglietto de mmito a quaccheduno che no l’aspetta, s’appontarrà na campagnata, lle se dirrà ca è aspettato a na tavola, ca la sera tale ll’amico X sujo lo vò à lo sposarizio, ecc: ecc. Sto tale se vestarrà pe uno de chiste mmite, se farrà pure quacche soprabbeto nuovo pe non scomparè, e quanno nce sarrà arrivato trovarrà ca lo signore X starrà fora p’affare suoje, o ll’ asciarrà dinto a lo lietto co na freva de cavallo e li miedece attuorno, o pure, requie a isso muorto e buono, saparrà ca dinto a otto juorne se sarrà atterrato co no malanno.
Ll’amico se ne tornerà a la casa soja tutto ‘ndiavolato, jastemmarrà pevo de no turco, farrà no sacco de defrische a chi è stato ca s’è spassato co isso, ma non c’è che dispiacè, è stato no scherzo de primmavera chillo che l’anno fatto Il’ amice, no poco de divertimento che s’anno voluto piglià co isso, no pesce d’aprile permesso, tra tutte quante le nnaziune.
Spassammoce, è lo mutto d’ordene mmiezo a tutte li guaje de la vita, e lo munno se spassa, e ttrova ‘ntra Il’autre divertemiente chillo de li cchiù stùpete qual’è lo pesce d’aprile.
Eppure sto coffio s’è talmente generalizzato a lo tiempo attuale ca non nc’è ragione de crederlo na cosa speciosa e de nova idea.
Lo pesce d’aprile lo stammo ricevenno tutte quante comme si fosse no comprimento che nce mànnáno a la jornata, e nisciuno se n’addona.
Li primme a farece chisto riale fujeno li signure de lo Piemonte, quanno mannannoce da Erode a Pilato se dicetteno frate nuoste, e nce rialajeno sto cèfaro co lo mazzo da fora.
Quanno se strillaje a la felicità nosta abbenì non fuje ca no pesce d’aprile.
Quanno nce se dicette ca sarria scioruto lo commercio fuje n’ autro pesce.
e ca ll’Unità d’Italia è no fatto conchiuso, sapite comme ve risponnarrammo?
– È no. . . . . .
LO TROVATORE
Da: Lu Trovatore: giornale-passatiempo
Digitalizzato da Google Libri