Di Domenico Giuseppe Bernoni
Na volta che gera ‘na mestra co tre putele, e un zorno fra i altri sta mestra ghe dise a ste putele:
— «Quela de vualtre che finirà più presto la tasca, andarà a scoar el pato.» Dunque finisce più presto la più granda, e questa la va a scoar el pato e la trova cinque soldi; alora la va da sta mestra, e la ghe dise: — «Mestra, la varda che go trovà cinque soldi. » Dise sta mestra: — «Ben, dameli qua che i sarà boni per far le fritole.» — E sta putela ghe li dà.
Co’ xe stà el zorno drio sta mestra ghe dise a ste putele: — «Chi de vualtre finirà più presto la tasca, andarà a scoar la scala. » — Finisce più presto la mezana, e questa la va a scoar la scala e la trova diese soldi: — «Mestra, mestra (la dise), la varda che go trová diese soldi.» «Ben (dise la mestra), dameli qua che i sarà boni per far le fritole.» — É la ghe li dà.
El diman sta mestra ghe dà la tasca a ste putele e la ghe dise: — «Chi finirà più presto la tasca andarà a scoar l’intrada. » Sta volta invece finisce più presto la più picola. Sta putela dunque va a scoar, e, scoa e scoa, la trova vinti soldi: — «Mestra, mestra (la dise), go trovà vinti soldi.» «Ben (dise la mestra), dameli qua che i sarà boni per far le fritole.» — E anca sta putela ghe li då.
Co’ xe stà el tempo de far le fritole, sta mestra se incorze che no la ga la farsora, e la ghe dise a la più picola de ste putele: — «Senti: va da Nono Cocon e dighe ch’el fazza el piacer de darte la so farsora, che po ti ghe la portarà in drio.» — Sta putela va da Nono Cocon: la bate la porta e la sente ‘na vose che dise:
— «Tanti ani, tanti mesi che no i bate sta porta, e adesso i la bate! Chi xe?» — «So’mi, so’mi, Nono Cocon (dise sta putela), che la mestra m’à mandà a tor la farsora per far le fritole.» — Nono Cocon ghe dà sta farsora e el ghe dise: — «Aricordite, co’ ti me la portarà in drio, de portarme un poche de fritole anca a mi co un poco de rosolio.» Ela ghe risponde: — «Ben, go capio.» — E la va a casa, e la ghe dise a sta mestra che Nono Cocon ga dà la farsora co pato che la ghe porta un piatelo de fritole anca a elo co un poco de rosolio. Dise sta mestra: — «Si, si.. ti ghe le portarà ti.» —
Dunque sta mestra fa ste fritole, e, fate che la le ga, la ghe ne mete via un piatelo, e po la ghe ne magna ela e la ghe ne dà a ste putele, e dopo la ghe dà sto piatelo co un poco de rosolio a la più picola che la ghe lo porta al Nono Cocon.
Quando che sta putela xe a meza strada, ghe vien vogia de magnarghene una: — «Oh (la dise), ghe ne magno una mi!» e la se la magna. La fa un altro tocheto de strada e ghe vien vogia de magnarghene un’altra, e la se magna anca questa; la ghe ne fa un altro toco e la dise: — «Za che ghe n’ò magnà do, magno anca quela de le tre» e la magna anca staltra. Dopo la dise: — «Co’ se magna, se beve» la beve un fià de rosolio; e cussi, senza che andemo avanti, la magna quela de le quatro e de le cinque e la beve un altro fià de rosolio, in fin za che la le ga magnae squasi tute e la ga bevuo tuto quanto sto rosolio. Alora la dise: – «Cossa gogio da far mi adesso che go magnà squasi tute le fritole e go bevuo tuto el rosolio?» — In quela che la stà a pensando, la vede un can, e la ghe dise a sto can: — «Can, caga qua» e la ghe mete el piatelo soto ‘l culo, e sto can ghe caga drento. Dopo la vede un gato, e la ghe dise a sto gato: — «Gato, pissa qua» e la ghe mete soto la bossetina del rosolio e sto gato ghe la impenisce de pisso. Finamente la cata un toco de muro, la lo grata, e la ghe lo mete sora le fritole a finta de zucaro. Alora la va a casa del Nono Cocon.. la bate la porta, e el Nono dise: — «Tanti ani, tanti mesi che no i bate sta porta e adesso i la bate!. chi xe?» — La putela ghe risponde: — «So’ mi, Nono Cocon, che ghe porto la farsora e anca le fritole co un poco de rosolio.»
Elo ciapa sto piatelo e ‘l magna una de ste fritole e el dise: — «Uhm.. che bona!» — El ghe ne magna un’altra, e el dise, parché la gera una de quele che gaveva fato el can: — «Uhm.. che cativa!.» — Alora el beve el rosolio, e el sente ch’ el xe pisso de gato: — «Ah, barona (el dise), speta mi che sta note te vegnarò a magnar.» —
Sta putela core a casa pianzando e la ghe dise a sta mestra che Nono Cocon, parchè la ga magnà le fritole, ga dito che sta note el la vignarà a magnar. Ghe dise sta mestra: — «Va là, stá queta, che nol vignarà; stroparemo tuti i busi de la casa, e nol podarà intrar.»
— Là, infati, la stropa tuti i busi de la casa, e po le va in leto.
Co’xe sul punto de la meza note le sente in tel camin un sussuro, un sussuro che mai: — «Ah, povarete nu (dise la mestra) che se semo desmentegae de stropar el buso del camin, e sicuro che Nono Cocon vien zo per sto buso!» — Da là un poco, se sente ‘na vose che dise: — «Varda che so’ su la napa mi.» — «Ah, mestra (dise sta putela), xe Nono Cocon.. el me vien a magnar.»
Dise la mestra: — «Fichite soto, fichite soto.» — El Nono torna a dir: — «Varda che so’ sul fogher!» — Sta putela no ghe ne pol più da la paura, e la mestra ghe dise a pian pianin: — «Fichite soto, fichite soto» e questa se fica soto. Alora Nono Cocon ghe dise: — «Varda che so’ in camara!» — E po: — «Varda che so’ vicin al leto!.» — E po: — «Varda che me sento in poltrona!.» — Scuro che gera, Nono Cocon no l’ à visto che la poltrona gaveva i aghi, e tal ch’ el se ga sentà suso el xe restà anca morto, parché tuti sti aghi i se ga impiantà sul culo, e ‘l se ga svená. Alora sta mestra e sta putela s’à levà, le ga ciapà el Nono Cocon una per i piè e st’ altra per la testa, e le lo ga butà zo per el balcon; e cussi Nono Cocon no ghe xe più e nol magna più nissun.
Mestra – ? Maestro/a
Mestra – ? Maestro/a persona che si propone a modello per la guida degli altri.
Tasca – compito
Farsora – padella
Tasca – compito
Farsora – padella
Google Libri
Tradizioni popolari veneziane: leggende, racconti, novelle e fiabe …,
Di Domenico Giuseppe Bernoni
2022